Mini-Kaassouffle

(6 – 8 mini-soufflés)

40 g botter
60 ml meel
200 ml melk
2 koppies gerasperde sterk cheddar of gruyère-kaas
3 eiers, geskei
knippie kremetart

Voorverhit die oond tot 180 °C. Smelt die botter in ‘n kleinerige kastrol. Sodra dit gesmelt is, voeg die meel by om ‘n roux te vorm. Hou ‘n oomblik aan roer en verwyder dan van hitte. Voeg melk bietjie vir bietjie by. Plaas terug op hitte en hou aan roer om ‘n redelike dik witsous te vorm. Gooi kaas bietjie vir bietjie by en hou aan roer tot al die kaas gesmelt is. Verwyder weer van hitte en roer eiergele by. Klits die eierwitte en kremetart tot styf. Voeg een derde van die eierwitmengsel by die kaassous en roer vinnig deur met ‘n metaallepel. Voeg daarna die kaassous by die oorblywende eierwit. Meng vinnig deur, maar wees versigtig dat jy nie te veel meng nie. Die idee is om soveel moontlik lug in die mengsel vas te vang. Spuit silikoon-muffinpanne goed en skep die soufflémengsel daarin. Maak elke holte driekwart vol. As metaalmuffinpanne gebruik word, moet die panne goed gesmeer en die bome met bakpapiersirkels uitgevoer word, wat
tot die grootte van die bome gesny is. Vul ‘n oondpan met sowat 2 cm kookwater. Plaas die muffinpanne in die oondpan en bak vir 15 minute. Haal die muffinpanne uit die water, laat ‘n oomblik afkoel en dop uit op ‘n bakplaat wat met gespuite bakperkament of ‘n silikoon-bakmatjie gevoer is. As metaalpanne gebruik word, moet die kante van die soufflés effens met ‘n mes losgemaak word voor jy hulle op die bakplaat uitkeer. Bak nog 10 minute teen 200 °C. Die soufflés kan ook vooraf gemaak en weer gebak word om uit te pof. As dit in die yskas gebêre is, moet die soufflés teen kamertemperatuur wees wanneer hulle gebak word. Voorverhit die oond tot 200 °C en bak vir 10 minute. Plaas die soufflé soos ‘n eiland in die middel van ‘n bord mosselroomsop, garneer en sit voor.