Hawermout-stafies met neute en bessies

Bestanddele:

Basis

150 g gouestroop

15 ml heuning

200 g margarien

350 g gerolde hawermout

60 g sagte bruinsuiker

Karamel

120 g bruinsuiker

260 g room

120 g margarien

Bolaag

35 g pampoenpitte

45 g donkersjokolade-splinters (chocolate chips)

35 g pekanneute

35 g gedroogde bosbessies (cranberries)

35 g gevlokte amandels

Metode:

Voorverhit oond tot 160 °C. Spuit ’n bakplaat van 23 cm by 23 cm met kleefwerende sproei.

Verhit die stroop, heuning en margarien saam in ’n pot totdat die margarien gesmelt het.

Haal die pot van die plaat af en roer die hawermout en bruinsuiker by. Wanneer alles goed gemeng is, gooi dit in ’n gesmeerde bakplaat en maak die bokant gelyk met die agterkant van ’n lepel.

Bak 20 minute of totdat dit ligbruin is. Laat afkoel.

Vir die karamel, verhit die suiker en room in ’n kastrol oor ’n medium hitte totdat die suiker opgelos is. Verhoog die hitte en bring mengsel tot kookpunt.

Kook vyf minute en roer terwyl die room verdik. Verwyder van hitte en roer margarien in.

Gooi dit nou oor die hawermoutbasis en sprei dit uit om die hawermout te bedek.

Strooi die pampoenpitte, sjokoladesplinters, pekanneute, bosbessies en geroosterde amandels daaroor.

Wanneer dit heeltemal afgekoel het, sny dit in stafies.

Bêre in ’n lugdigte houer.