Oornagbrood

Knus om die tafel. Geniet ons oornagbrood

Somer sê tot siens en ons krag is onvoorspelbaar. Juis die tyd om vriende op te beur met ‘n mooi herfstafel en die ketelbraai (of koolstoof) in te span vir ‘n koningsmaal.

Die brood rys stadig oornag in jou yskas om dit ekstra geur te gee.

genoeg vir 6 – 8

• 45 ml heuning
• 100 ml louwarm water
• 250 ml jogurt
• 45 ml olyfolie
• 10 g kitsgis
• 500 g (890 ml) koekmeel
• 10 g sout

Plaas heuning, water, jogurt en olie in ’n groot mengbak (of bak van elektriese menger). Voeg res van bestanddele by en meng tot stywe, kniebare deeg vorm. Knie 5 – 8 minute of tot deeg glad is. Vorm deeg in ronde bal en plaas op bakplaat wat goed met kleefwerende kossproei gespuit is. Plaas in yskas en laat 8 uur rys of oornag.

Verhit Weber tot warm – jy moet jou hand 10 sekondes bo die kole kan hou. Onderste ventilasiegate moet oop wees as jy brood bak. Of verhit die oond tot 180 °C. Haal deeg uit yskas en sny met skerp mes kepe in oppervlak om dit mooi te laat lyk. Bak 25 – 30 minute of tot brood goudbruin en gaar is. Laat afkoel op afkoelrakkie en sit voor met botter.

Wenk: Jy kan die brood ook laat rys in ń broodmandjie met mooi patrone