Blitsvinnige Melktert

Blitsvinnige melktert

1 liter melk
2 teelepels vanilla
1 eetl margarien
1 kop suiker
Knypie sout
Bring tot kookpunt.
3 eetl mazeina of 3 eetl vlapoeier
3 eetl meel
3 eiergele (hou eierwitte eenkant)
Meng en gooi by gekookte melk. Roer vinnig tot dit dik is, draai plaat stadig. Klits 3 eierwitte styf en voeg by mengsel. Baie belangrik, dit maak dit vulsel “lig en romerig” .Skep in voorafgebakte tertdeeg, ek pak sommer tennisbeskuitjies in bak of maak 1 pakkie tennisbeskuitjies fyn met 100gr gesmelte botter en druk vas in tertbak, en voeg melktertmengsel stadig daarop. Strooi bietjie kaneel bo-oor. Sit in yskas om te stol.

Milo Koekies

MILO KOEKIES

1 ½ kop witsuiker
1 ½ kop bruinsuiker
3 eiers
375g marg
3 3/4 kop bruismeel
1 ½ kop milo
1 ½ kop sjokoladesplinters
1 teel vanilla

Klits wit en bruinsuiker saam eiers. Voeg marg by. Voeg bruismeel, milo en sjokolade by. Gooi vanielje by. Laat staan vir 10 min. Skep klein skeppies op bakplaat en bak vir 10 – 15min by 180C . Laat staan vir paar min voor jy dit vd plaat afhaal (moet net bietjie hard word)

Milo - Sjokolade Koek

MILO-SJOKOLADE KOEK

125 g botter, kamer temperatuur
60 ml strooi suiker
195 gram koekmeelblom (1 en 1/4 kop meel)
12,5 ml bakpoeier
150 g Milo poeier
3 eiers
125 ml karringmelk

Kondensmelk Versiersel:
150 g botter, by kamertemperatuur
350 g versiersuiker
160 ml kondensmelk

Vir die Sjokolade Ganache:
300 ml room
400 g donker sjokolade
125 ml Milo poeier

Bak die koek:
Voorverhit die oond tot 180°C. Smeer ‘n 20cm koekpan met margarien (of spuit) en voer dit met bakpapier uit.
Room die botter en suiker saam tot glad en romerig. Voeg die eiers een vir een by en klits goed na elke byvoeging. Sif die meel, bakpoeier en Milo saam en dan voeg dit bietjie vir bietjie by die bottermengsel terwyl op stadige spoed geklits word. Klits nou die karringmelk in. Gooi die beslag in die koekpan en bak vir 40-45 minute of tot toetspen gaar uit die middel van die koek kom. Laat die koek vir 10 minute afkoel en keer dan uit. Laat heeltemal op ‘n draadrakkie afkoel.

Maak die Kondensmelk Versiersel:
Plaas die botter in ‘n menkbak en klits vinnig tot lig en romerig – voeg die versiersuiker en kondensmelk by en klits tot goed gemeng. Sny die koek in drie gelyke dele, en dit die koeklae aanmekaar met die versiersel.

Maak die Sjokolade Ganache:
Smelt die room, sjokolade en Milo in ‘n kastrol op die stoof of in ‘n mikrogolfvaste bak in die mikrogolf. (Die Milo is geneig om klontjies te maak, so die voorstel is om dit eers in die warm room op te los voordat die sjokolade bygevoeg word.) Laat die mengsel goed afkoel totdat dit maklik kan smeer en bedek die hele koek daarmee. (As jy haastig is kan jy die ganache in die yskas sit om af te koel – soos dit kouer word, so word dit stywer en kan dit makliker smeer. Moenie wag tot dit te koud is nie, want dan smeer dit weer baie moeilik.)

Deur: Leandra v/d Westhuizen

Lagie Lagie Poeding

LAGIE LAGIE POEDING

1 Pakkie tennis beskuitjies
1 blikkie kondensmelk
250ml room
1 tl vanlije geursel
½ kop suurlemoensap
Meng alles goed tot dik gladde mengsel. (behalwe die koekies)
Pak tennis beskuitjies onder in’n bak, gooi mengsel oor, pak weer lagie tennis beskuitjies, weer lagie mengsel, – voltooi tot alles klaar is.
Verkoel vir ten minste 6 ure in yskas of verkieslik oornag.
Jy kan dit versier deur bietjie krummeltjies van die tennis beskuitjies oor te strooi, kan klapper oorstrooi, houertjie granadilla mousse oorsmeer, gerasperde sjokolade, rasper lemoen of suurlemoenskil oor,
Ek sit die resep so en kyk… weet julle wat sal baie lekker werk. ‘n Blikkie fyn pynappel (gedreineer) wat jy ook tussen die lae kan insit. Eindig af met lagie. pynappel en miskien klapper

Roomkaas lagie lagie Yskaskoek

Roomkaas lagie lagie  yskastert

Roomvulsel
1 na 2 pakkies tennisbeskuitjies
2 koppies room
1 houertjie roomkaas , verkoel (dws direk uit die yskas)
125 gr botter, kamertemperatuur
1 blikkie kondensmelk
1/3 koppie sjokolade bv rolo’s in stukkies gekap

Versiering
Ganache
1/3 koppie volroom room
1/3 koppie gekapte sjokolade

Krummels
4 koekies gekrummel
Gekapte neute (opsioneel)

Om die ganache te maak }
Verhit room tot amper kookpunt ( in die mikrogolf of op die stoofplaat) Haal van die stoof af
Voeg sjokolade by – gee 1 roer en los dit net so – ongestoord vir 2-3 minute.
Met behulp van ‘n lepel, roer tot glad

Maak die roomvulsel
Klits botter tot romerig , voeg roomkaas 1 eetlepel op ‘n slag by totdat dat dit ‘n gladde mengsel is. (daar moet glad nie meer roomkaas klonte wees nie) Gooi die kondensmelk by en meng tot goed deurgemeng
Klits room tot styf
Vou nou die styfgeklopte room met ‘n houtlepel in by die kondensmelk mengsel. Moenie die hele klomp room op een slag ingooi nie –verdeel die room so in +/- 3 dele

Neem nou ‘n vierkantige bak en voer uit met foelie. Laat die kante oorsteek. Jy gaan as jou koek klaar gepak is die foelie afhaal sodat jou koek ‘n mooi vierkant vorm.
Sit ‘n bietjie van kondensmelkmengsel onder in jou vierkantige tertbak (bo-op die foelie) , pak 4 tennisbeskuitjies op en druk mooi styf vas

Sit ongeveer ¾ koppie kondensmelkmengsel bo-op die beskuitjies en versprei egalig. Gaan nou so aan met jou lae koekies en kondensmelkmengsel tot alle klaar is.(Hou bietjie van die kondensmelkmengsel uit om om die hele koek te smeer.
Haal nou jou koek uit die bak deur dit met die foelie uit te lig – druk die koek mooi in ‘n vierkant – Verwyder foelie en sit op tertbord neer.
Smeer nou die laaste gedeelte van die kondensmelkmengsel om en rondom die koek
Neem die koekiekrummels en druk dit rondom die koek saggies vas met jou palm
Gooi die ganach stadig oor die bo-kant – pasop dat dit nie afloop nie, maar as dit afloop is dit nie die ergste nie – Versier die kante van die koek met gekapte neute (indien jy dit gebruik)
Versier met jou 1/3 kop gekapte sjokolade bo-op

Sit die koek in die yskas vir tenminste 24 uur
Haal uit en bedien teen kamertemperatuur.
Indien verkies, kan jy die koek in ‘n glasbak maak , dit in blokkies sny en so bedien.

Murgpampoentjiekoek met Sjokolade Roomkaas

MURGPAMPOENTJIEKOEK MET SJOKOLADE ROOMKAAS

Edik van Nantes se Nataniël en Erik bring hulde aan sjokolade met dié murgpampoentjie-koek met sjokolade-roomkaas.

Koek:

3 k bruismeel
1 t bakpoeier
½ t sout
2 k suiker
3 eiers, geklits
1 k groente-olie
2 t vanielje-ekstrak
1 t fyn kaneel
skil van ½ suurlemoen, fyn gerasper
2 k murgpampoentjie, fyn gerasper
½ k okkerneute

METODE
Meng bruismeel, bakpoeier, sout en suiker saam in ’n groot mengbak.
Meng eiers, olie, vanielje, kaneel, skil en murgpampoentjie saam.
Vou by meelmengsel.
Vou neute by.
Voer bodems van twee kleefvrye losboompanne (22 cm in deursnee) met bakpapier.
Verdeel beslag tussen twee panne en maak bokante gelyk.
Bak in oond teen 180 ˚C vir 45 minute.
Laat afkoel in panne.

Sjokolade-roomkaas:

250 g roomkaas
2 e vars room
2 tot 3 k versiersuiker
120 g donker sjokolade, gesmelt

METODE
Klits roomkaas tot lig en skuimerig.
Vou room by.
Meng versiersuiker by tot romerig maar ferm.
Smeer versiersel mildelik op elke koek en plaas bo-op mekaar.
Opsioneel: Versier met skerwe donker sjokolade.

Bron:kyknet.dstv.com

Bevrore Bloubessie-jogurt

Bevrore bloubessie-jogurt

Bessies is nie net fantastiese somervrugte in die lieflikste helder kleure nie, maar bevat ook ’n klomp antioksidante wat help om die vrye radikale te beveg wat liggaamselle beskadig en selfs laat doodgaan. Antioksidante help om jou gesond te hou en verskeie studies het al getoon dit kan help om hartsiektes, kanker en ander siektetoestande te keer.

Maak: 8-10
Bereidingstyd: 15 minute, plus yskas- en vriestyd
Gaarmaaktyd: 10 minute

• 50 ml suiker
• 150 g bloubessies
• 1 kg-houer gewone jogurt

1 Verhit die suiker en 50 ml water in ’n kastrolletjie. Roer tot die suiker oplos, voeg die bloubessies by en verhit dit tot kookpunt. Verlaag die hitte en laat dit vir vyf minute prut, tot die stroop verdik het. Laat eenkant afkoel en sit dan vir 30 minute in die yskas. Sit terselfdertyd die vorms in die vrieskas. (Ons het metaalvorms en klein jogurtbakkies gebruik.)

2 Gooi die jogurt in ’n roomysmasjien en laat dit loop tot die mengsel dik en amper bevrore is. As jy nie ’n roomysmasjien het nie, kan jy die jogurt in ’n vlak bak gooi en vir 30 minute vries. Breek dan die yskristalle met ’n vurk op en herhaal die proses nog twee of drie keer.

3 Skep van die bloubessiesous in die vorms, skep ’n laag jogurt bo-oor, gevolg deur nog bloubessies. Hou aan lae skep tot die vorms vol is. Sit vir 15 minute in die vrieskas.

4 Druk nou ’n soliede lepel of roomysstokkie in die middel van elke houer. Vries dit oornag. Doop die vorms vir drie sekondes in kookwater en trek die lollies aan die lepels of stokkies uit.

Melktert-poeding

Melktert-poeding

Lynsaad bevat fito-estrogeen en sojamelk isoflavone, wat albei cholesterol kan verlaag. Omega 3 is baie belangrik vir jou hart en kom voor in lynsaad, hawermout én eiers. Boonop bevat kaneel fitonutriënte wat ook goed is vir jou hart.

Genoeg vir: 4
Bereidingstyd: 25 minute
Gaarmaaktyd: 10 minute
Oondtemperatuur: 180 °C

• 500 ml sojamelk
• 1 kaneelstokkie
• 1 groot omega 3-verrykte eier
• 45 ml bruinsuiker
• 60 ml mielieblom
• 5 ml vanieljegeursel
• fyn kaneel om voor te sit

Basis
• 350 ml hawermout
• 50 g pekanneute
• 50 ml lynsaad
• 50 ml botter, gesmelt

1 Gooi die sojamelk en kaneelstokkie in ’n kastrol en verhit dit tot dit net begin kook. Haal van die plaat af. Klop die eier en suiker saam, gooi ’n bietjie van die gekookte melk daarby en roer goed. Gooi die eiermengsel by die melk en meng goed. Sit terug op die stoof en laat prut vir twee minute – roer die heeltyd.

2 Meng die mielieblom met ’n bietjie water tot ’n pasta. Gooi ’n bietjie van die melkmengsel by die mielieblompasta en roer goed. Gooi in die kastrol. Roer goed deur en laat liggies prut vir vyf minute of tot die mengsel verdik het. Haal die kaneelstokkie uit en gooi dit weg. Roer die vanieljegeursel by. Laat afkoel en roer gereeld sodat daar nie ’n velletjie bo-op vorm nie.

3 Maak die basis deur die hawermout oor ’n bakplaat te strooi en dit vir 10 minute in die verhitte oond te laat rooster. Laat effens afkoel. Gooi dan die geroosterde hawermout, neute en lynsaad in ’n voedselverwerker en pols tot fyn. Voeg die gesmelte botter by en pols weer tot gemeng. Gooi die basis-mengsel in glase of klein ramekins en skep die melktertmengsel bo-op. Sit warm of koud voor met fyn kaneel.

Nektarienblokkies in Earl Grey-stroop

Nektarienblokkies in Earl Grey-stroop

Maak: 4 klein flesse
Bereidingstyd: 30 minute
Kooktyd: 40 minute

• 1 kg ferm maar ryp nektariens
• 250 ml suiker
• 90 ml vars suurlemoensap
• 60 ml Earl Grey-teeblare
• 500 ml kookwater

1 Was die nektariens, verwyder die pitte en sny die vleis in stukke van 1,5 cm. Plaas dit in ’n kastrol, gooi die suiker en suurlemoensap bo- oor en sit dit eenkant.

2 Plaas die teeblare in ’n beker of bak en voeg die kookwater by. Laat dit vir 20 minute trek, gooi dit deur ’n sif en gooi die teeblare weg. Gooi die tee in ’n kastrol en verhit dit tot kookpunt. Laat dit vir 10 minute prut tot dit met die helfte verminder het.

3 Gooi die tee oor die nektariens, sit die kastrol terug op die stoof en verhit dit tot kookpunt. Verlaag die hitte en laat dit liggies prut vir 30 minute. Haal die kastrol van die plaat af. Skep die warm nektariens in warm gesteriliseerde flesse, verseël dit en plak etikette op.

4 Die nektarienblokkies is sag en heerlik op skons, pannekoek of wafels met room, of skep dit oor roomys, of roer dit deur natuurlike jogurt. Hou dit in die yskas nadat jy dit oopgemaak het.

Gevlekte Lamsboud

Gevlekte lamsboud

Genoeg vir: 8
Bereidingstyd: 45 minute, plus marineertyd
Gaarmaaktyd: omtrent 1 uur

• 1 lamsboud, ontbeen en gevlek (vra jou slagter om dit te doen)
• olyfolie
• 60 ml droë witwyn
• 2 knoffelhuisies, fyngedruk
• 15 ml grofgekapte vars roosmaryn
• 30 ml bruinsuiker

Sous
• 60 ml sjerrie-asyn
• 60 ml olyfolie
• 15 ml bruinsuiker
• 15 ml elk fyngekapte vars ment en pietersielie
• 3 sprietuie, fyngekap
• 5 ml gerasperde suurlemoenskil

Groente
• 1 bakkie baba-rosatamaties
• 1 eiervrug, in skywe gesny en met sout besprinkel
• 4 soetmielies
• 60 ml botter
• mikrokruieblaartjies of roket, om voor te sit

1 Gebruik ’n skerp mes en maak snytjies in die vetlaag van die lamsboud. Meng 50 ml olyfolie met die wyn, knoffel, roosmaryn en suiker. Sit die vleis in ’n verseëlbare sak, gooi die marinade by en verseël die sak. Smeer die marinade oraloor die vleis en laat dit vir ’n uur eenkant marineer, of sit dit oornag in die yskas.

2 Haal die vleis uit die marinade wanneer jy gereed is en laat die ekstra marinade afdrup. Braai dit vir vyf minute aan ’n kant oor matige tot warm kole tot dit mooi bruin is. Lig die rooster hoër en rooster dit vir nog 40-60 minute oor matige tot flou kole tot dit so gaar is soos wat jy dit verkies. Verf die vleis met die orige marinade terwyl jy dit rooster. Jy sal dalk later weer die rooster moet laat sak soos die kole kouer word.

3 Haal die boud van die rooster af, bedek dit liggies met ’n stuk foelie en laat dit vir 10 minute eenkant rus. Sny dit in dun skywe en pak dit op ’n opdienbord.

4 Meng al die bestanddele vir die sous saam en skep dit oor die vleis. Pak die tamaties, bereide eiervrugskywe (sien stap 5) en soetmielies (sien stap 6) ook op die opdienbord en garneer dit met mikrokruie of roket. Sit dit voor met die pastaslaai.

Partytjiehoedens

5 Eiervrug Vee die sout van die eiervrugskywe af. Drup lekker baie olyfolie oor die eiervrug en geur dit met varsgemaalde swartpeper. Rooster dit oor matige kole tot die eiervrug bruin en sag is.

6 Soetmielies Kook die soetmielies vir vyf minute en laat dit behoorlik dreineer. Rooster dit oor matige warm kole tot dit begin bruin word en sag is. Smeer ’n bietjie botter oor elkeen sodra jy dit afhaal en geur dit met sout en peper. Sny elke soetmielie in vier stukke.

Gemmer-en-nektarienkaaskoek

Gemmer-en-nektarienkaaskoek

Genoeg vir: 8
Bereidingstyd: 45 minute plus stoltyd
Gaarmaaktyd: 10 minute

• 1 pakkie gemmerkoekies, fyngedruk
• 100 ml (100 g) gesmelte botter
• 185 ml vars lemoensap
• 5 ml agar-agar-poeier (vegetariese plaasvervanger vir gelatien)
• 1 x 460 g-bakkie roomkaas
• 1 blik kondensmelk
• 20 ml suurlemoensap
• 250 ml room
• 6 vars nektariens of pruime
• 125 ml (110 g) suiker
• 5 cm-stuk vars gemmer, geskil en in skyfies gesny

1 Meng die koekies en botter saam en druk dit op die bodem van ’n losboom-pasteipan van 22 cm vas.

2 Gooi die lemoensap in ’n kastrol en voeg die agar-agar by. Laat dit eenkant week vir vyf minute en verhit dit dan oor lae hitte. Roer totdat die agar-agar opgelos is. Haal dit van die plaat af en laat dit eenkant afkoel.

3 Klop die roomkaas tot glad en klop dan die kondensmelk bietjies-bietjies by. Roer dit by die lemoensapmengsel en voeg die suurlemoensap by. Klop die room by en vou dit by die roomkaasmengsel in. Skep dit oor die koekiekors. Laat dit vir minstens vier uur in die yskas stol.

4 Sny intussen kepies in die vrugte en bedek dit met kookwater. Laat dit vir ’n minuut staan, dreineer en bedek dit met koue water. Skil die vrugte en sny dit middeldeur. Haal die pitte uit. Sny dit in skywe. Verhit die suiker en gemmerskyfies in 125 ml water. Laat dit vir 10 minute prut, gooi die vrugteskywe by en laat dit vir nog vyf minute prut. Haal dit van die plaat af. Laat dit eenkant afkoel en sit dit dan in die yskas tot voor opdiening.

5 Haal die kaaskoek uit die pan. Drup die vrugtesous bo-oor. Sny die koek in skywe en sit dit voor saam met die vars vrugte.

Soetgoed vir diabete - Feestelike koek

Soetgoed vir diabete – Feestelike koek

Bereidingstyd: 20 minute
Baktyd: 40-50 minute
Oondtemperatuur: 160 °C

• 3 ekstragroot eiers, geskei
• 2 ekstragroot eierwitte
• 235 ml (160 g) suikerplaasvervanger (ons het Huletts Sugalite gebruik)
• 15 ml suurlemoensap
• 200 ml (120 g) koekmeel

Versiersel
• 2 ekstragroot eierwitte
• 1 ml kremetart
• 375 ml (300 g) suikerplaasvervanger
• 50 ml water
• 5 ml vanieljegeursel

1 Klop die eierwitte styf en klop dan 100 g van die suikerplaasvervanger en die suurlemoensap bietjies-bietjies daarby in.

2 Moenie die klitser afspoel nie en klop die eiergele tot liggeel en dik. Voeg die res van die Sugalite bietjies-bietjies by en klop tot dit opgelos het.

3 Gebruik ’n groot metaallepel en vou die eiergele by die eierwitte in.

4 Sif die meel en sout drie keer saam, en sif dit dan in lae oor die eier. Vou elke laag liggies met die lepel in. Herhaal tot al die meel bygevoeg is.

5 Voer die bodem van ’n ronde koekpan van 20 cm met waspapier uit. Gooi die beslag in die gevoerde pan en tik liggies daarteen om van lugborrels ont- slae te raak. Bak in ’n verhitte oond vir 40 tot 50 minute of tot die kors ’n ligte goudbruin kleur het. Haal uit die oond uit en laat heeltemal afkoel.

6 Versiersel Meng al die bestanddele behalwe die vanieljegeursel in die boonste deel van ’n dubbelkastrol en verhit dit oor kokende water. Klits aanhoudend met ’n eierklitser vir ongeveer sewe minute tot dit stywe punte vorm. Haal van die plaat af, voeg die vanieljegeursel by en klop tot dit styf genoeg is om sy vorm te behou. Smeer die versiersel dadelik oor die afgekoelde koek.

Suikervry: Ongebakte Sjokolade-kaaskoek

SUIKERVRY: Ongebakte sjokolade-kaaskoek

Stevia is ’n groen blaarplant van Suid- Amerika, waar dit eeue lank gebruik is vir goeie spysvertering en om wonde mee te verbind. Dis deesdae in poeier- en vloeistofvorm te kry as ’n plaasvervanger vir suiker. Stevia het verskeie voordele, sê Sally-Ann Creed, ’n voedingkundige van Kaapstad. Dis kilojoule-vry én die veiligste opsie as dit by versoeters kom. Stevia is baie soet en jy het min nodig. Jy kan dit op sy eie gebruik, of die helfte van die suiker in ’n resep daarmee vervang. Stevia het ’n nasmaak as jy te veel gebruik – gaan dus spaarsaam te werk!

Maak: 1 x 20 cm-kaaskoek of 16 mini-kaaskoeke
Bereidingstyd: 20 minute, plus yskastyd

Kors
• 10 sjokolade-hawermoutkoekies of ander suikervrye koekies, fyngemaak
• 50 ml gesmelte botter

Vulsel
• 20 ml gelatien
• 250 g roomkaas, teen kamertemperatuur
• 150 ml suurroom of gewone jogurt, teen kamertemperatuur
• 1,5 ml steviapoeier
• 80 ml kakaopoeier, plus ekstra om oor te sif
• frambose, om voor te sit

1 Kors Meng die koekiekrummels en gesmelte botter saam en druk dit in ’n liggies gesmeerde 20 cm- veerklamppan of individuele koekpannetjies vas. Hou in die yskas.

2 Vulsel Sprinkel die gelatien oor 20 ml water. Laat dit swel en smelt dit dan in die mikrogolfoond.

3 Klits die roomkaas, suurroom of jogurt, suiker (indien gebruik), stevia en kakao saam tot glad. Meng ’n bietjie van die roomkaas- mengsel by die gelatien in en meng dan die gelatienmengsel by die orige roomkaasmengsel in. Gooi oor die kors en laat vir vier uur of oornag in die yskas stol.

4 Gebruik ’n warm paletmes om die kaaskoek los te maak. Sif ’n bietjie kakao oor en sit voor met frambose of ander vars vrugte.

Brandewyntert

Brandewyntert

Maak: 2 terte
Bereidingstyd: 30 minute
Baktyd: 25 minute
Oondtemperatuur: 190 °C

• 225 g ontpitte dadels, fyngekap
• 10 ml koeksoda
• 115 g (105 ml) botter
• 210 g (250 ml) suiker
• 2 groot eiers
• 270 g (500 ml) koekmeel
• 10 ml bakpoeier
• 30 ml gekapte okkerneute

Sous
• 210 g (250 ml) suiker
• 30 ml botter
• 5 ml vanieljegeursel
• 60 ml brandewyn

1 Sit die dadels in ’n glasbak en sprinkel die koeksoda bo-oor. Gooi 250 ml kookwater oor die dadels, roer dit deur en laat dit eenkant staan.

2 Klits die botter tot dit romerig is. Voeg die suiker by en klits dit tot dit lig is. Voeg die eiers by en klits dit goed. Vou die meel, ’n knypie sout, die bak-poeier en gekapte okkerneute by. Roer laastens die dadel-mengsel by.

3 Verdeel die beslag tussen twee gesmeerde tertbakke en bak dit vir 25 minute in die verhitte oond.

4 Sous Verhit die suiker, botter en 250 ml water in ’n kastrol terwyl die terte in die oond is. Laat dit vir vyf  minute prut en haal dit van die plaat af. Voeg die vanieljegeursel en brandewyn by en giet dit oor die terte terwyl dit nog vuurwarm is.

Bros Varklies

Bros varklies

Beïndruk jou gaste met dié maklike Oosterse dis.

Genoeg vir: 6-8
Bereidingstyd: 20 minute
Gaarmaaktyd: omtrent 2 uur
Oondtemperatuur: 220 °C

• 1,5-2 kg stuk varklies aan die been met die vel aan
• ½ ui, in dik ringe gesny
• 1 wortel, grofgekap
• 6 steranyssade
• 15 ml Chinese vyfspeserypoeier
• 10 ml grondboonolie
• 2 knoffelhuisies, fyngedruk
• 10 ml gerasperde vars gemmer
• 80 ml sojasous
• 100 ml heuning
• 80 ml droë sjerrie
• 2-6 gedroogde rooi rissies
• 4 sprietuie, in skyfies gesny

1 Sit die varklies in ’n groot kastrol en bedek dit met water. Voeg die uieringe, wortel en twee steranyssade by en verhit dit tot kookpunt. Verlaag die hitte, sit die deksel op en laat dit vir 20 minute prut. Haal dan die varklies uit die water en sit dit op ’n draadrak om heeltemal droog te word.

2 Gebruik ’n skerp mes en sny dia-mante in die vel wanneer die vark-lies droog is. Vryf die vyfspesery-poeier oor die onderkant van die lies. Sprinkel ’n bietjie growwesout oor die vel en vryf dit in.

3 Sit die varklies op ’n rakkie in ’n oondroosterpan en sit dit in die oond wanneer dit goed warm is. Rooster dit vir 20 minute, verlaag die hitte tot 150 °C en rooster dit dan vir nog 1½-2 uur of tot die vleis sag is.

4 Maak die sous terwyl die vleis rooster: Verhit die grondboonolie in ’n kastrol. Voeg die knoffel en gemmer by en soteer dit vir ’n paar minute voor jy 80 ml water en die orige bestanddele (behalwe die sprietuie) byvoeg en vir nog vyf minute laat prut. Voeg die sprietuie by en prut dit vir nog drie minute. Haal dit van die plaat af en hou dit eenkant.

5 As die speklaag nog nie behoorlik bros is nie, kan jy dit vir nog ’n paar minute onder die roosterelement sit. Haal die varklies uit die oond wanneer dit reg is, maar laat dit vir 20 minute rus voordat jy dit in blokke sny en saam met die sous voorsit.